بزوتنەوەی کۆمۆنیزمی/ سۆشیالیزمی لەگەڵ بزوتنەوەی کرێکاراندا زۆر جیاوازن .
17/11/2025
بزوتنەوەی کۆمۆنیزمی لە هەوڵی هەڵوەشاندنەوەی کاری کرێگرتە و سیستەمی سەرمایەداریدایە دروستکردنی کۆمەڵگەیەکی ناچینایەتی و ناپلەبەندیی.
هەرچیش بزوتنەوەی کرێکارییە لە هەوڵی باش کردنی هەل و مەرجی سەر کار و زیادکردنی کرێ و باشترکردنی ژیانیانە. بەواتایەکی دیکە کار لەسەر ڕتوشکردن و ڕیفۆرمکردنی سیستەمی سەرمایەداری و مانەوەی دەکەن.
تا ئێستاش خەباتی کرێکاران خەباتی ئابووریانەیە نە سیاسیانە ، خەباتی نقابیانەیە نە حیزبییانە ، دژ بە دەسەڵات و دەوڵەت نییە، بەڵکو خۆگونجاندن و ڕەواییبوونی خۆیەتی لە سای سیستەمەکەدا بەڵام بە ژیانێکی باشترەوە. کرێکاران دەتوانن حکومەتەکان ، دەوڵەتەکان لە ماوەیەکی کەمدا بگۆڕن بەڵام ناتوانن و ناشیانەوێت هەرەس بە سیستەمەکە بهێنن و بیگۆڕن .
توخم و حیزبە کۆمۆنیستەکان/ سۆشیالیستە دەسەڵاتخوازەکان خۆیان باش دەزانن کە کرێکاران شۆڕشگێر نین بە واتای لەناو بردنی سیستەمەکە و دامەزاندنی سۆشیالیزم/ کۆمۆنیزم، هەر بەو هۆکارەشە ئەوان خۆیان بە دینەمۆی شۆڕش دەزانن و لە هەوڵی گواستنەوەی هۆشیاری سیاسی و شۆڕشگێڕانەدان بۆ ناویان . چونکە ئەمان تەواو پێجەوانەی ئەوان بیر دەکەنەوە بە گرتنەدەستی دەسەلات و گوایە لەڕێگەی ئەو دەسەڵاتەوە ئەوان دەتوانن کۆمەڵ بەرەو کۆمەلێکی ناچینایەتی و ناپلەبەندی ببەن .
ئەمەش لەبەر ئەوەی کرێکاران شادەماری ئابووری وڵاتیان لە دەستدایە و دەتوانن ژیان بوەستێنن، قازانج ڕاگرن ، دەوڵەت و سسیستەمەکەی سست بکەن، کۆمۆنیستەکان و سۆشیالیستە دەسەڵاتخوازەکان دەیانکەنە پەیژەیەك بۆ بەدەستهێنانی دەسەڵات هەر وەکو چۆن پێشتر ڕووی داوە.
ئەمە بارودۆخی کرێکاران بووە لە کۆن و ئێستاشدا ، بەڵام ناتوانین کتێب بۆ ئایندە بگرینەوە و بزانین چۆن دەبن .