بەڵێ : یەکسانبوونی ژنان بە پیاوان دروشمێکی بی مانا و هەڵخەڵەتێنەرە، کەچی هێشتا ویردی سەر زمانی چەپەکان و خودی ژنانیشە.
5/11/2022
لەسەر داوای چەند هاوڕێیەك و هەم بۆ وەڵامی چەپەکان رونکردنەوەیەك لە سەر ئەو بابەتەی سەرەوە دەدەم.
پۆستەکە لایك و کۆمێنتێکی زۆری بەدوای خۆیدا هێنا. من سوپاسی زۆری هەموو بەشداربووان و بەشداریکردنەکەیان دەکەم . ڕەنگە هەندێك لە لایکەکان هەر خۆیان باوەڕیان بە یەکسانی ژنان و پیاوان نە بێت ، هەندێکیشیان کەم تا زۆر ڕەنگە لە مەبەستەکەم گەیشتبن . هاوکاتیش لەبەر ئەوەی وتنی شتێکی ئاوا تابۆیە و لە کتێبە موقەدەسکاندا نەهاتووە و نەوتراوە ، ئیتر برادەرە جەپەکانم بۆیان قەبوڵناکرێت و توانای ئەوەشیان نییە بیدەنە بەر گردەڵەی فکر و هێزی لیکدانەوەی خۆیان .
ڕوونکردنەوە:
یەك: ئەو برادەرانە لێرەدا پرسی جیانیەتی و کۆمەڵی جیانیەتی لەبیر دەکەن کە خودی پیاو خۆی لەم کۆمەڵەدا چەوساوەیە و کۆیلەیە. ڕاستە لە کۆمەڵی ئیسلامیدا پیاو هەندێك ئازادیی زیاتری هەیە بەڵام لەگەڵ ئەوەشدا لەوێش و لە کۆمەڵەکانی دیکەشدا هەر چەوساوە و کۆیلەن. کۆیلەی کارن، کۆیلەی بانقن ، کۆیلەی دەسەڵاتن ، کۆیلەی بازاڕن ، کۆیلەی حیزبن، کۆیلەی خێزان و کۆیلەی نەریتی کۆنەپەرستی و دین و مەزهەبن . ئایا دەمانەوێت ژنانیش یەکسان بن بە پیاوان لەو هەموو کۆیلە بوونەدا؟
دوو : هەر پرسی چینایەتی: باشە ژنان یەکسان بن بە چ تۆێژاڵێکی پیاوانی کۆمەڵ: توێژاڵە دەسەڵاتدارەکان ، ساماندارەکان ، سەرمایەدارەکان، هەژارەکانی کۆمەڵ. … کامیان ؟
سێ: هەر لە نێو کۆمەڵی چینایەتیدا: یەکسانی بۆ چ جۆرە ژنێك ، ژنانێك؟ ژنانی هەژار یا سامانداران؟ ئایە جیاوازییەك نییە لە نێوانی ژنانی چەوساوە و ساماندار و ژنانی پلە باڵادا؟
چوار: باسکردنی یەکسانی و داخوازی یەکسانی ژنان بە پیاوان لە کۆمەڵی هەنووکەدا یانی چی؟ کە کاتێك خودی پیا و خۆی کۆیلەیە؟ کە کاتێك کۆمەڵ کۆمەڵی چینایەتییە؟!!
پێنج: ئەی لە ڕوی بایۆلۆجییەوە ، ئایا دەکرێت لە ئێستادا لە سای ئەم سیستەمەدا یەکسانبوونی ژنان بە پیاوان لە ڕوی بایۆلۆجییەوە هەبێت و بەدی بهێنرێت؟
شەش: لەم کۆمەڵەدا یەکسانیبوونی ژن بە پیاو یانی کارکردنی زیاتر لە دەرەوەی ماڵەوە، سەرەڕای کارەکەی ناوماڵی و دایکایەتییەکەی، یانی چەوساندنەوەی زیاتری ژنان وەکو پیاو لەسەر کار . واتە ژنان دووجار چەوساوە و کۆیلە دەبن هەم لە ماڵ و هەم لە سەر کار. ڕەنگە گۆڕانی دروشمەکە لە یەکسانی لە چەوساندەوەدا لە سای ئەم سیستەمەدا دروستتر بێت وەکو دروشم لە دروشمی یەکسانی حەقیقی ژنان و پیاوان.
حەوت: ئەوەمان لەبیر کردووە کە سیستەمی کار و سەرمایە لەتەك هەوڵی خوودی ژناندا لە ئێستادا تا رادەیەك زۆر لە جیاوازی ژنان و پیاوانی بۆ بەرژەوندی خۆی فەراهەم کردووە . لەبەر ئەوە ئەو یەکسانییەی کە داوا دەکرێت دەبێت دیاریبکرێت: لە چ ڕوویەکەوە ؟ لە چ ئاستێکدا ؟ چۆن و چی یەکسانییەك ؟
هەشت : هەندێك برادەر لە کۆمێنتەکانیانا نوسیویانە یەکسانی لە ماف و فرماندا ، واتە مافی کارکردن ، مافی شووکردن و خۆشەویستی و بازاڕکردن و میرات ، ئەگەر کۆمەڵ کۆمەڵی ئیسلامی بێت .
هاوکات ئەمان ئەوەیان فەرامۆش کردووە کە سەرمایەداریی لە کۆمەڵی ” مۆدیرەنەدا” لەو جۆرە مافانەی زیاتریش بۆ ژنان فەراهەم کردووە کە ئەمان داوای دەکەن . هەر بۆ نموونە لە ئێستادا قسە لەسەر ماف و ناسینی جێندە ئایدێنتەتی دەکرێ و مەسەلەیەکی گەرم و گوڕە تا ئەو ڕادەیەی سەرانسەری گروپ و حیزبە چەپەکانی لە بریتانیا کردووە بە دوو بەشەوە.
ناسینی جێندە ئایدێنتەتی ئەو قۆناخە تێپەڕ دەکات کە گەر ژنان یا پیاوان بیانویستایە ڕەگەزی خۆیان بگۆڕیایە بۆ ڕەگەزەکەی دیکە دەبوایە بە پرۆسەیەکی زۆر دوور و درێژ و و ئازاراویی و گرانبەهادا بڕۆیشتنایە . بەڵام لە ناسینی جێندە ئایدێنتەتیدا تەنانەت کچێك ، ژنێك هەر وتەی خۆی دەخوات کە بڵێت من پیاوم یا پێچەوانەکەی دوای ئەوەی کە لە لایەن دەوڵەتەوە [ ڕەنگە شارەوانییەوە] وەکو ویستی کەسەکە تۆمار بکرێت، ئیتر ئەو کەسە هەموو مافێکی هەیە بە گوێرەی ئەوەی کە ناونوسکراوە بێ ئەوەی بە پرۆسەی گۆڕینی ئەندامە سێکسییەکانیدا بڕوات . هەر بۆ نموونە مافی ئەوەی هەیە کە لە یانە وەرزشییەکاندا ژنەکە بێت لە تەنیشتی تۆوە کە پیاویت لە ژوری خۆگۆڕینەکە خۆی بگۆڕێت و بە ڕووتی بێت و بروات و دوشی خۆی بکات چونکە خۆی دەڵێت من پیاوم . پیاویش بەهەمان شێوە لە ژوری خۆگۆڕینی ژناندا.
پرۆسەی ناسینی جێندە ئایدێنتەتی لە هەر تەمەنێکی سەرەوە تاکو تەمەنی 16 ساڵ کە منداڵیکە دەگرێتەوە واتە ئەوەندە کارئاسایی لەو بوارەدا کراوە. لە ئێستادا پەڕلەمانی سکۆتلەندە بە زۆرینە بڕیاری لەسەر داوە .
کەواتە مافەکان لەوەی کە کوردێك چاوەروانی لێدەکات لەم کۆمەڵەدا هەیە و یا سەندراوە زۆر زیاترن . هەرە زۆرینەی ئەو برادەرانەی باس لە یەکسانی لە مافدا دەکەن ڕەنگە بە دەگمەن ئەم زانیارییە بزانن و بە دەگمەنیش لە ناویاندا ئەمە قەبوڵ دەکەن.
ئەنجامگیریی :
لەبەر ڕۆشنایی ئەو خاڵانەی سەرەوە بەرزکردنەوەی ئەو دروشمە بەو ڕەهاییە کە هەیە دروشمێکی بێ مانا و هەڵخەڵەتێنەرانەیە. بۆیە لەم سەردەمەدا بۆ مرۆڤی ئەم کۆمەڵە، کۆمەڵی سەرمایەداری دروشمێکی ئاوا قەبوڵکراو نییە، ناکرێت ئاواش گشتگیریی بێت ، بەڵکو دەکرێت خودی یەکسانییەکە کە داوا دەکرێت دیاری بکرێت و سنوردار بێت. بۆ نموونە لە ئێستادا دروستە گەر باس لە یەکسانی ژنان و پیاوان لە کرێ و موچەدا، لە میراتی و مافی هاوسەرگیریی و بەیەکەوە ژیان و جیابوونەوە لە یەك و لە چێشتنی خۆشی و ناخۆشی ژیاندا و زۆر بواری دیکە بکەین .