کاتێك کە بزوتنەەوی چەکداریی جێگەی بزوتنەوەی جەماوەریی دەگرێتەوە ، ئیتر نەگبەتییەکان لەوێوە دەستپێدەکەن و کۆتاییان نایەت:
29/04/2017
سەرکەوتن و شکستهێنانی بزوتنەوەی چەکداریی هەردووکیان وەکو یەکن ، ئەو ساتانەشی کە سەرکەتنێکی وەختی لە پارچە زەوییەکی تەسکدا بەدەستدەهێنیت، ئەو کاتەش سەرتایەکی دیکەیە بۆ تێشکاندنێکی درێژخایەن.
سەراپای بزوتنەوە چەکدارییەکانی چەرخی ڕابوردوو ئەمانەی ئێستاش نوشوشتییان بۆ گەلەکەیان و بۆ بزوتنەوەی جەماوەریش ، تۆمارکردووە ، بڕاواننە بزوتنەوەکانی : فەلەستیینیەکان ، پڵنەکانی سریلانکە ، فارسی کۆلۆمبییا ، ماوییەکانی فلیپین و کوردایەتییەکەی باشوور ڕۆژهەڵات.
گەر لە شوێنێکی وەکو باشور و فەلەستین-دا بە حوکمی هەندێك بارو دۆخی ناوچەیی و سیاسەتی بەناو کۆمۆنێتی نێو دەوڵەتی ، شتێكی کەمیان بە دەست هێنابێت ، ئەزموونی هەردوکیان، ئەوە دەسەلمێنێیت کە لە سەر شکستیهێنانیی خەڵکەکەی ، جەماوەرەکەی، بوە ، شتێکیان دروستکردوە کە لە ئێستادا بە ئامان و زەمان ناتوانر ێت لاببرێت.
بزوتنەوەی چەکداریی هەمیشە بە خزمەتی دەوڵەتانی ناوچەکە و بەشێکی جیهانی گەڕاوەتەوە ، نەك خودی خەڵکەکەی خۆی. هەمیشە لەبری لاوازکردنی دەوڵەتەکەی کە شەڕ دژی دەکرێت، بەهێزتری کردووە و دەکات ، هەر بۆیەش دەوڵەتەکان ، سیستەمی جیهانی لە هەوڵی فووتێکردنی ئەو بزوتنەوەیەدان ، تاکو ئەو کاتەی کە پێویستیانە.
هەڵبەتە بارودۆخی باکور و ڕۆژاوا جیاواز بوو ، بزوتنەوەیەکی بە ڕاستی جەماوەریی لە ئارادا بوو ، کە لە بەرژەوەندی هێچێك لە وڵاتانی ناوچەکە و جیهان و تەنانەت حیزبە لۆکاڵییەکانیش نەبوو. ڕێڕەوی نوێی ئەمان گۆڕینی خەباتکردنیان بوو لە چەکدارییەوە بۆ جەماوەری و لە دەوڵەت-نتەوەوە بۆ مرۆڤدۆستی ، بۆ بەیەکەوەژیان، بۆ نەهێڵانی نادادپەروەری ، بۆ پوچکردنەوەی وەهمی هەموو ئەو بزوتنەوانەی کە تا ئێستا هەبوون و بەڵام بە کردەوە ، دەقاو دەقای پێچەوانەی قسەیانی ، کردووە و سەلماندووە ، بۆ گەلێکی دیکە…..بوو
دیار بوو ، ئەمانەش لە قازانجی دەوڵەتانی ناوچەکەو ڕۆژاواو حیزبەکانی باشوریش نەبوون و نیین ، باشترین تاکتیکێکیش کە ئەو دوو بزوتنەوە لاواز بکرێت ، ئاڵاندنیان بوو لە جەنگەوە چ لە باکور و چ لە ڕۆژاوادا.
دەبوایە دەرك بەوە بکرایە بە گەوەرەکردنی بەرەی چەکداری و فراوانکردنی بەرەی جەنگ ، تەسککردنەوەی بەرەی جەماوەریییە و گەڕانەوەی ڕؤلی حیزب و لەدەستدانی ئەوانەن کە بەدەستهاتبون . لە باکوریش بە چەشن کارکردن لەسەر گەڕانەوەی پەکەکە بۆ ساڵانی 80 کان، لە دەستدانی هەموو شتێکە کە دەستەبەرکرابوون ، ئەوە ئاشکرا بوو لە ماوەی ڕاگرتنی شەڕدا ئەوەندەی کە بەدەستهێنرا، لە ماوەی 30 ساڵی شەڕی ڕابوردوو و سەد ساڵی شەڕی ئایندە ، بەدەستنایەتەوە . زیادکردنی ژمارەی چەکدار، شەڕی زیاتر سەرەڕای زەرەرە ڕۆحی و مادییەکان ، وەخت نەمانەوەیە ، بە فیڕۆدانی پارە و کەرەسە سەرچاوەییەکانی دیکەیە ، کە زەروورە لە کانتۆنەکان لە بوارە جیا جیاکان سەرف بکرێت. سەرقاڵی بە جەنگەوە یانی فەرامۆشکردنی لایەنە زەروورییەکانی دیکە.
بەداخەوە ئەمەی ئێستا لە ڕۆژاوا و لە باکور ڕوودەدات ، بە زایەدانی ڕەنج و ماندووبونی ئۆجەلانە کە نزیکەی 18 ساڵە هەوڵی بۆ دەدا، هەوڵی بەجەماوەرییکردنی بزوتنەوەکە بوو ، هەوڵی پاراستنی کەوتنە ژێر ڕکێفی ئەمەریکاو ڕوسیا، بوو.
ئیتر کاتی ئەوەیە کە جورئەتی ئەوەمان هەبێت کە بە پەکەکە و پەیەدە بڵێن ، گەر دەتانەوێت کارەساتی زیاتر بۆ ڕۆژاواو باکور دروست نەبێت ، دەبێت بە سیاسەتی هەڵەتانا بچنەوە و ئەو کەسانەی کە بەرپرسیارن لەو بارودۆخەی کە خولقاوە، واتە لە لەباربردنی بزوتنەوە جەماوەریەکەی باکور و ، لە ڕۆژاواش بوونە بەدیهێنەری ئامانجی دەوڵەتانی ناوچەکە و وڵاتانی ڕۆژاوا ، دوور بخرێنەوە و لە بڕوا و متمانەی خەڵك ڕوتبکرێنەوە.
ئەوەی کە ماوەتەوە بیڵێم بۆ ئەوەی تاوانبار نەکرێم، دەڵێم ، هەڵوێستی من هەڵوێستی ڕەخنەو هاریکارییانەیە هەر وەکو وابوە و تا ئێستاش پشتگیری لە هەردوو بزوتنەوەکە دەکەم بەڵام نەك بە هەموو نرخێك، نەك بە هەموو باجدانێک، نەك بە گرتنەبەری هەموو تاکتیکێک، نەك بە کارکردن لەسەر لاوازکردنی بزوتنەوەی جەماوەریی لە هەردوو لادا.