مردنی نەوشیروان موستەفا
19/05/2017
هەرگیز بە مردن و کوشتنی هیچ کەسێك خۆشحاڵ نیم . مردنی نەوشیروانم پێناخۆشبوو هەم بە هۆی ئەوەی کە من خۆم باوکم و ئەویش باوکی دوو کوڕ و کچێکی لاو بوو. کە بە داخەوە ئەو سێ لاوە هەروەکو لە بێ دایکێتی کە زۆر زوو بوو ، مەحروم بوون ، لە تەمەنێکی زۆر لاویشدا، بێ باوك کەوتن ، کە ئا لێرەدا من بەشداریی خەم و پەژارەیانم.
لە لایەکی ترەوە پێمناخۆش بوو چونکە گەلێك پرسیار هەبوون کە نەوشیروان موستەفا ، بێ وەڵام هێڵانییەوە ، گەلێکێس قوربانیکران ، بێ قەرەبوو، مانەوە [هەڵبەتە مەبەستم قەرەبوەکرنەوەی پارە نییە] ، جەنگی ناوخۆ و قوربانیدانی خەڵکانێکی یەکجار زۆر ، بێ شرۆڤەیەکی بێ لایەنیی تا ڕادەیەك عادلانە، بێ وەڵام مانەوە ، لە هەڵگیرسانی ئەو شەڕانەدا ، لە لایەن نەوشیروان موستەفاوە ، هەموو چوونە ڕەفەی لە بیرچووەوەی مێژووە، مەجزەرەکەی پشتئاشان و قەڕناخە بۆ ئێمە ، کە نەوشیروان تاکە کەسێک بوو لە وردوو درشت و سەرەتا و سەرەنجامی ئەو قەسابخانەیەی دەزانی ، بۆ هەموومان، بە بێ وەڵام مانەوە.
بەڵی زۆرێکی دیکە کە لە بزوتنەوەی ڕەشی کوردایەتییدا ڕویداوە و بە قوربانی کراوە و نەوشیروان موستەفاش وەکو کاراکەتەرێکی سەرەکی و سەکردەیەکی دێرین و دیاریی ئەو بزوتنەوەیە ، لێی بە ئاگا بوو ، بەڵام تا ئێستاش ئێمە بێ ئاگایانە و جار جارەش تاوانبارکردنی ئەم و ئەو و لە غیابی تۆمارکردنێکی بێ لایەنانەدا ، کە نەوشیروان موستەفا ، وەکو چەند کەسێکی کەمی دیکە دیتوانی ڕۆشناییان بخاتە سەر، عەوداڵین ، بەڵام نەکرا، کە دەیتوانی هەم ڕۆحی خۆشی پێشادکاو ، هەم ویژدانیشی پاکبکاتەوە و هەم ئێمەش بە ڕاستییەکان بگەیەنێ ، بەڵام مەخابن هیچی نەکرا .
ئەفسوس ، سەد جار ئەفسوس نەوشیروان موستەفا مردو هەموو ئەو نهێبنانەی لەگەڵ خۆی ، بردە ژێر گڵەوە.
هاوکاتیش بە مردنەکەی چاپتەرێکی ڕەشی کوردایەتی و بزوتنەوەکەش مرد . دەڵێم چاپتەرێکی ڕەش بوو ، چونکە بزوتنەوەی کوردایەتی هەر لە سەرەتای دروستبوونیەوە بە تەواوکردنی کارەکانی حکومەتە یەكبەدواکانی عێراق-دا و بەهێزکردنی یەکدی ، تەواو بوو. چشتێ دیکەی بۆ هەژاران و ئەو وڵاتە نەهێنا.
چاپتەرێك بوو لە پاکتاوکردنی یەکدی و نەیارانیان و ئافرەتان و هەڵگیرسانی شەڕی ناوخۆ و هەر جارە و بە ‘پیاو’ بوونی حکومەتێك و بەشداربوون لە کارەساتی ئەنفال و کیمیاوی و دامەزاراندنی دەوڵەتێكی شێوە دەوڵەتی بەعس و دواجاریش کەرتکردنی یەکێتی لەژێر ناوی ڕیفۆرم و گۆڕانکارییدا ، کە هەر هەموو ئەمانە ئەزموونێکی فاشل بوون .
حەزم دەکرد نەوشیروان موستەفا کاتێك کە دەمرد ، بە ویژدانێکی سافەوە ، دڵێکی بێ گەردەوە ، ژیانی لە دەستبدایە هەم خۆشی دڵنیا و مورتاح بکردایە و ئاشتیشی بۆ دڵ و دەرونی خۆی بگێڕایەتەوە، هەم بۆ قوربانییەکانیشی. مەبەستم لە قوربانییەکان گەلی کورد هەموویەتی نەك ئەوانەی کە بوونە قوربانی لە ئاکامی ئەو سیاسەتە ڕەشەی کە لە 1961 وە بەردەوامە و لەوەش دەکات تا ماوەیەکی دیکەش هەر بەردەوام بێت. بەڵام بە داخەوە ئەو ڕۆیشت ، بە ڕۆیشتنەکەشی نە خۆی مورتاح کرد و نە ئێمەش.
بیر و هۆش و دڵم ، بەڕاستی ، لە لای منداڵەکانییەتی ، نەك خۆی .
xxxxxxxxxxxxxx
21/05/2017
دوای مردنی نەوشیروان موستەفا ، ڕاستییەکان باشتر دەبینرێن:
وەکو برادەرێك لە پۆستێکیدا بۆ مردنی نەوشیروان موستەفا نوسیبووی ” ئەوەندە فرمێسکی ڕاست و درۆ بۆ مردنی نەوشیروان موستەفا لە فەیسبوکدا ڕێژراوە، مایکرۆسۆفت خەریکە ئاو دەیبات” .
ئەو برادەرە ڕاستدەکات، لە دکتۆر و مامۆستای زانکۆوە تا خوێنەوار و نەخوێنەوار و ڕۆژنامەوان و سیاسییەکان و مشەخۆرەکان … هەر هەمووی کەوتنە شین و شەپۆڕ بە نوسینی وتار و هەڵبەست و پەخشانە هەڵبەست. دیارە ئەمانە نە لە ڕاستیی کەسایەتی و چالاکی سیاسیانەی نەوشیروان موستەفاوە بوو نە لە بەهێزی و بە توانایی خۆشیانەوە بوو . بەڵکو ئەمانە بەڵگەیەکن ، ڕاستییەك زیاتر دەردەخات کە ئێمە چەند گەلێکی کڵۆڵین، چەند میللەتێکی لاوازین ، چەند سیاسیی و ڕۆژنامەوان و نوسەرێکی فاشلین، چەند تاکێكی [فەرد] گەوجێنراو لاواز و جێی بەزەیین ، چەند خاكێکی بێ پیت و بڕشتین کە ئەم خاکە بە هاوکاری دین و کوڵتوری نەتەوەیی و پەروەردە و پێگەیاندنی توڕەهات و سەقەت ، بە باڵادەستی حیزب، نەیتوانی کە دەیەکی[ یەك کەس لە دە کەس ] ئەو تاکانەشی کە دروستیان دەکات، سەربەخۆ و بن.
هاوکاتیش ئەم خاک و میللەتە توانی دەیەها سەرکردە ، دەیەها حیزب درروست بکات ، دەیەها شەڕ بەرپابکات ، ئەمبەرەوبەری دەیەها حکومەت بکات . باوەڕناکەم بە بەراورد بە کەمی نفوسی کورد لە باشورردا، هیچ میللەتێك ئەوەندەی ئێمە سەرکردەو حیزبی ، هەر وەکو بڕکەی بێستان، هەڵخستبێت ، هیچ وڵاتێک و هیچ میللەتێك ئەوەندەی ئێمە ناسۆری چێشتبێ ، ئەزموونی شەڕی دیتبێ ، بەڵام لەگە ئەوەشدا بە دەگمەن سەرکردەیەکی هەڵخستبێ ، کە خائین نەبووبێت، کە بەکرێگیراو نەبووبێت ، کە ماڵوێرانکەر نەبووبێت.
مردنی نەوشیروان موستەفا ئەوەی زیاتر سەلماند ئەم میللەتە، ئەم خاکە ، ئەم فەردەی ئەم گەلە ، هێشتا زۆر ، زۆر ، ساڵانێکی دووروو درێژیان ماوە تاکو لەسە پێی خۆی بوەستێت . تازە پاش ئەم هەموو ئەزموونە ترش و سوێرانە ، پاش ئەم هەموو شین ئەشكانە ، پاش ئەم هەموو کارەسات و وێرانکاریانە ، پاش ئەم هەموو ئەزموونە فاشلانە …. پاش ئەم هەموو …….تازە ئامانجی خۆیان، فریاڕەسی خۆیان ، ئومێدی داهاتوی خۆیان بە سەرکردەیەکەوە ، بە حیزبێکی ئایندەوە، دەبەستنەوە .
ئای کە دڵم ژان دەکات بۆ ئەو خەڵکە . تەنانەت ئەو” سەرکردە خاکیە هەژاردۆستەش” ئەویش لە ماوەی 8 ساڵدا نەیتوانی کە یەکێك، تاکە یەکێك پەروەردە بکات کە جێی خۆی بگرێتەوە ، ئیدی دەبێت چۆن چاوەڕوانی گۆڕان –ی لێ بکرێت. هەیهوو هەیهوو. تەنها شتێکی باش کە کردبێتی ئەوە بوو کە ‘دانی’ بۆ دواکەوتووانی نەدا، کە شەڕ دژی بارزانی یا یەکێتی هەڵگیرسێنن. جگە لەمە کەسێك ناتوانێت تەنها شتێكی باشی ئەم ” سەرکردە باشە” بڵێت کە لە هەموو ژیانی ” خەباتیا” کردبێتی . من نامەوێت لیستێکی دووروو درێژتان بۆ ڕەشبکەمەوە ، لە کاتێکدا کە ئەو’ شەیتان دەستی لێهەڵگرتووە’ .
تکایە بمبورن دۆستانی گۆڕان و کەس و کاری ئەو پیاوە، بە تایبەت منداڵەکانی گەر ئەم قسەیەی من بریندارتان بکات ، بەڵام ئەوە هەقەتە.
لە کۆتاییدا دەتوانم بڵێم وەک چۆن خەڵکانێك قوربانی دەستی نەوشیروان موستەفا بوون ، ئەویش خۆی قوربانی دەستی بزوتنەوەی کوردی و سیاسەتی ڕەشی کوردایەتیی و ئەو بزوتنەوەیە بوو.