عەفرین ؟ دەبێت زۆر بوێرانە پەنجە لەسەر زامەکان دانێین، بەسە لۆمەی ڕۆڵی دەرەوەی خۆمان!!
زاهیر باهیر – لەندەن
21/03/2018
عەفرین نە کەوتووە و نە دۆڕاوە و نەپرسە و ماتەمینیشی دەوێت ،شەڕڤانانی نەبەرد بە هەموو بەشەکانییەوە لەگەڵ خەڵکی ئازا و بوێری عەفرین-دا دووەم گەورەترین داستانی نەبەردیی و جەنگیان دوای شؤڕش لە کەتەلۆنیا دژ بە فاشیزم و بەڕبەریییەتی نەك هەر دەوڵەتی تورکیا بەڵکو ناتۆ و ” کۆمێنێتی نێودەوڵەتی” تۆمار کرد. ئیسپانیای 1936 لە عەفرین-دا دووبارە بووەوە .
عەفرین ئەستێرەیەکی گەشاوەی مێژووی بەرەنگاربوونەوە بوو لە ناو سەراپای بەرگرییەکانی دیکەدا کە مێژوو نیشانی داوە بە تایبەت دوای نەبەردەکانی شؤڕشی کەتەلۆنیا کە بە هاوبەشی کرێکاران و زەحەمەتکێشان و ئەنارکیستەکان و سۆشیالیستە نادەسەڵاتخوازەکانا ڕویدا.
عەفرین مێژوویەکی بۆ خۆی دروستکرد کە هەتا مێژووی بەشەرییەت بەردەوام بێت ، ناو و شۆرەی خۆڕاگریی و بەرگریی و دژایەتی فاشیزمی دەوڵەتیی و سیستەمی سەرمایەداریی ، بۆ خۆی تۆمار کرد . پەنجاو هەشت ڕۆژی بەرخۆدان ، نەك دەوڵەتی تورکیا و هاوپەیمانەکانی هێنایە لەرزە و هەشەکۆ بەڵکو ” کۆمێنێێتی نێودەوڵەتی” ش ، بۆیە کەسێك ناتوانێت لۆمە و سەرزەنشتی شەڕڤانان و عەفرینییەکان بکات.
عەفرین ئەو پارچە زەوییە بوو کە نەك هەر لە سوریادا جیاواز بوو ، بەڵکو لە هەموو ڕؤژاوای ناواین-دا تاك و جیابوو . حەوت ساڵی ڕەبەق دوور لە شەڕی کوشتن و بڕین و کاولکاریی نێوانی دەوڵەتی سوریا و ” موعارەزە ” و نێوانی خودی گروپەکانی ” موعارەزە” بوو ، حەوت ساڵی ڕەبەق توانی هێڵێک لە نێوانی خۆی و شوێنەکانی دیکەدا بکێشێت. عەفرین ئەو پارچە زەوییە بوو کە زیاتر لە 200 هەزار سوریی لەوێ مرۆڤایەتی خۆیان ، یەکساێتی نێوانیان، ئاشتی و ئاشتەوایی و ڕێز و حورمەتی خۆیانیان تیادا دۆزییەوە .
ئەوەی کە جێگای لؤمەیە ، ئەوەی کە شایانی پرسە بۆ دانانە ، ئەوە سەرکردەکانی پەیەدە و سیاسەتە هەڵەکەیانە ، ئەوە ئەوانن کە دەبێت نەك بە خۆیانا بچنەوە بەڵکو دەبێت لێپرسینەوەی چڕ و پڕیان لەگەڵدا بکرێت و سزایەکی وابدرێن کە بۆ هەمیشە دووربخرێنەوە لە مەیدانی خەباتی جەماوەریی ڕۆژاوا، نەك هەمان شکست دووبارە ببێتەوە .
تاکە وانەیەك و دواوانەیەك کە لە عەفرین وەرگیرێت ئەوەیە: هەرگیز متمانە بە ڕابەر و سەرکردە مەکە ، هەرگیز پشت بە حیزب مەبەستە و باوەڕی پێ مەکە ، حیزب و سەکردە هەمیشە پلانی خۆیان هەیە و لە پشتی جەماوەرەوە بێ گەڕانەوە بۆیان ، لە وتووێژو سازش-دان. لە پرسی عەفرین و هەر هەموو ڕۆژاوادا ، سەرکردەکانی پەیەدە دژایەتییەکی گەورەی ئۆجەلان و هزری نوێی ئۆجەلان-یان کرد ، هاوکاتیش گەورەترین خزەمەتیان بە ئاگاوە یا بێ ئاگاوە بووبێت ، بە ئەمەریکا و وڵاتانی ڕۆژاوا کرد بە هاوپشتتیان بۆ ئەمەریکا ، کردنی هێزی خۆبەخشی بەرگریی یەپەگە و یەپەژە لە ڕۆژاوا بە هێزێکی هێڕشبەری پارێزەری بەرژەوەدنییەکانی ئەمەریکا ، بە بەردەوامبوونی شەر لەگەڵ داعش لە ڕەقە و مەنبج و جەڕابلوس و شوێنەکانی دیکە ، بە قەبوڵکردنی پرۆژەکەی ئەمەریکا کە دروستکردنی هێزێکی 30 هەزارکەسی بۆ پاراستنی سنورەکان ، بێ ڕەچاوکردنی مەترسی هێڕشی تورکیا و هاندانی بۆ شەڕێکی ئاوا، لە لایەن پەیەدەوە ، نەتوانایی کردنی یارییەک وەکو ئەردۆگان تاکو بتوانن ، لە مەیدانەکەدا بمێننەوە و ئەوەی کە بەدەستهاتووە ، بیپارێزن. زۆر هەڵەی سیاسیانەی دیکە ، هەن بەڵام لە ئێستادا هەر ئەوانە باس دەکەم .